Рөстәм Миңнеханов: “Бүген торак-коммуналь хуҗалыгы мәсьәләсе – иң катлаулысы”
Узган шимбәдә, 18 февраль көнне, ТР Министрлар Кабинетында Президент Рөстәм Миңнеханов үткәргән чираттагы киңәшмәдә 185нче Федераль законның үтәлеше, муниципаль берәмлекләрдәге мәгариф объектларын төзекләндерү, фельдшер-акушерлык пунктлары төзү, төзекләндерү, модернизацияләү, шулай ук “Чиста су” программасының үтәлеше мәсьәләләре каралды.
Киңәшмәдә хәбәр ителгәнчә, 2013 елда 162 гомуми белем бирү учреждениесен, 5 махсус коррекция мәктәбен төзекләндерү каралган.
Күпфатирлы йортларны 2013 елга капиталь төзекләндерү программасына 811 йорт кергән, тулаем сумма – 4 млрд 354 млн сум.
“Бүген торак-коммуналь хуҗалыгы мәсьәләсе – илебездә иң катлаулысы. Хөкүмәткә карата иң күп дәгъвалар торак-коммуналь хуҗалыгында хезмәтләрнең сыйфаты, аларның халык өчен ачык һәм аңлаешлы булуы белән бәйле”, – дип билгеләп үтте Р. Миңнеханов.
“Чиста су” программасы буенча 10 муниципаль берәмлектә, шул исәптән безнең районда да, проект-смета документациясен әзерләү эшләре инде төгәлләнгән.
Министрлык, торак инспекциясе һәм муниципаль берәмлекләр белән бергә каралган халыктан җыелган акчаларны Дәүләт инвестиция-төзелеш учреждениесенә күчерү мәсьәләсе буенча ситуация төрлечә.
Мәсәлән, безнең район акчалары суд эшчәнлеге кысаларында идарә итүче оешмадан эллеккеге елларның бурычы өчен энергия белән тәэмин итүче компанияләр исәбенә күчерелде.