Өлкәннәр компьютерга өйрәнә

РФ Пенсия фонды идарәсе каршында эшләп килүче “Россия пенсионерлар союзы” иҗтимагый оешмасының райондагы бүлеге пенсионерларны компьютерда эшләргә өйрәтү буенча курслар оештыра. Узган ел Мусабай Завод авылында укулар алып барылса, быел курслар өч авыл җирлегендә – Мәләкәстә, Күзкәйдә һәм Бәткедә оештырылды. Күптән түгел мәләкәслеләр әлеге курсларны тәмамлады. Компьютер серләренә өйрәнгәнлекләрен раслап, узган атнада РФ Пенсия фонды идарәсенең район бүлеге башлыгы вазыйфаларын башкаручы Фәридә Әгъләҗева аларга сертификатлар тапшырды. Нигездә хатын-кызлардан торган төркем өчен бу 8 Март бәйрәме алдыннан зур бүләк булды.
“Өченче буын университеты” мәгариф программасы нигезендә төзелгән әлеге курслар 72 сәгатькә исәпләнгән. Белем алган өчен пенсионерлар кесәләреннән бер тиен дә акча чыгармый. Түләүләр “Россия пенсионерлар союзы” исәбеннән башкарыла. Мәләкәстә укырга теләк белдерүчеләрдән 10 кешелек төркем тупланган. Күрше авыл дип тормаганнар, Иске Җирекледән дә вакыт табып килгәннәр. Өлкәннәр өчен беренче дәрес биредә октябрь башында үткәрелгән. Шулай итеп, пенсионерлар атнага ике мәртәбә кичке якта урта мәктәпнең информатика кабинетына килеп, компьютерда эшләү серләренә төшенгәннәр. Ә ул серләрне өлкәннәргә мәктәпнең информатика укытучысы Зөбәрҗәт Липатова өйрәткән.
Ханымнар Мәләкәскә читтән кайтып төпләнгәннәр, бүген алар виртуаль юл белән Украинадагы, Үзбәкстандагы һәм башка төбәкләрдәге дуслары, туганнары, сыйныфташлары белән аралашалар. Бүген иң киң кулланыла торган сайтларның берсенә – ТРның дәүләт хезмәтләре порталына кереп тә үзебезгә файдалы бик күп мәгълүмат алабыз, түләүләребезне карыйбыз, диләр алар.