Авыр елларда ферманы тоткан апа-әбиләрне зурладылар

Халыкара хатын-кызлар көне алдыннан да Иске Абдул клубының иркен фойесын тутырып гомерләре буе терлекчелектә эшләгән әбекәйләрне һәм бүген ферманы яшәтүче яшьләрне бергә җыеп зурладылар.
Бәйрәм кичәсенә Мерәс, Торнаташ, Иректаң, Иске Абдул, Артамоновка, Левашово авылларыннан иң авыр елларда сауган сөтен 10ар кадаклы чиләк белән кул очыннан ташыган, бозавын-сарыгын да караган, тавык фермасында меңәрләгән чебеш үстергән, дуңгызчылыкта да көнне-төнгә ялгап хезмәт куйган ветераннар һәм бүген Сәйдәшев исемендәге хуҗалыкның терлекчелек тармагында эшләүче савымчылар, бозау караучылар – барысы 128 хатын-кыз чакырулы иде. Кызганычка каршы, авыр сугыш елларында яшүсмер килеш хезмәт биографиясен башлаган, яшьләре инде 80нән үткән әбекәйләрнең берничәсе килә алмаган. Аларга бәйрәм күчтәнәчләрен өйләренә илтеп тапшырачаклар.
Бәйрәм кичәсен ачып, хуҗалык җитәкчесе Марат Сафин авылның яшәешен тәэмин итүче гүзәл затларны язның тәүге бәйрәме белән котлады, фидакарь хезмәтләре өчен ихлас рәхмәтен җиткерде. Хуҗалыкның баш икътисадчысы Илсур Сафин белән бергәләп, бәйрәм өстәле артына җыелган әбекәйләрнең һәркайсын иңнәреннән кочып аллы-гөлле чәчәкләр төшкән шәлъяулыклар япканда, күпләр мөлдерәп тулган яшьләрен тыя алмады: хисләр тулып ташыды.
Үсмер чагы сугыш елларына туры килгән 82 яшьлек Мәликә апа Миңнәхмәтованың сөйләгәннәре үзе бер китап язарлык.