Районда “Торак-2013” операциясе башланды

Әлеге карар нигезендә авыл җирлекләре башлыклары һәм районның торак оешмалары җитәкчеләре күпфатирлы йортларда яшәүчеләрне бергә җыеп, капиталь һәм агымдагы төзекләндерү программасы кысаларында янгынга каршы чараларга өстәмә рәвештә акча җыю зарурлыгы турында аңлатырга тиешләр. Шулай ук торакны мич белән җылытучылар тарафыннан янгын куркынычсызлыгы кагыйдәләрен бозуны кисәтү максатында, янгын күзәтчелеге дәүләт инспекторлары катнашында авыл җирлекләрендә шәхси секторда яшәүчеләрнең мич җиһазларын тикшерү мөһим. Ялгыз картларга һәм инвалидларга мичләрен бушлай төзәтү мөмкинлеген дә карарга кирәк. Авыл җирлекләре башлыклары энергетик күзәтү хезмәте вәкилләре һәм районның җаваплы белгечләре белән берлектә шәхси сектордагы электр җиһазларын тикшерүне оештырырга да бурычлы. Шәһәрдән янгын сүндерү командасы килеп җиткәнче, янгын зонасыннан кешеләрне ашыгыч рәвештә чыгару, милекне саклап калу, янгынны сүндерергә керешү максатында, район җирлекләрендәге җылытыла торган гаражларда һәм яраклаштырылган биналарда янгын сүндерү машиналары шоферларының һәм ирекле янгын сүндерү подразделение әгъзаларының тәүлек буена кизү торуын оештырырга кирәк, диелә әлеге карарда. Ирекле (муниципаль) янгын сүндерү төркемнәренең әзерлеге хакында көн саен хәбәр итеп тору да авыл җирлекләре башлыкларының даими контролендә булырга тиеш.