Тукай муниципаль районы

Ятимнәрне читтә калдырмау аеруча мөһим

2013 елның 29 мае, чәршәмбе

ТР Министрлар Кабинетында Балаларны яклау көненә багышлап үткәрелгән видеобрифингта ТР яшьләр эшләре, спорт һәм туризм министры урынбасары Рөстәм Гарифуллин 2011-2013 елларда тормышка ашырылучы “Татарстан балалары” программасы кысаларында үткәреләсе чаралар хакында сөйләде.

Район мәгариф бүлегеннән хәбәр итүләренчә, мондый чаралардан безнең белем бирү учреждениеләре дә читтә калмый. Быел аларның һәрберсендә “Балачак – иң бәхетле ил” дип аталган бәйрәм үткәрелә. Психологик, педагогик һәм социаль-хокукый ярдәм бирү максатыннан, ата-аналар өчен җыелышлар уздырыла, Яр Чаллы, Алабуга шәһәрләренә экскурсияләр оештырыла, балалар иҗтимагый оешмалары активистлары, сәләтле балалар бүләкләнә. Физик мөмкинлекләре чикле балалар өчен 31 майда сабан туе рәвешендә сәламәтлек көне үткәрелә.

Бу көннәрдә ятимнәрне, балалар йортында тәрбияләнүчеләрне дә игътибардан читтә калдырмау аеруча мөһим, диелде киңәшмәдә. Бу җәһәттән Татарстан Республикасында бала хокуклары буенча вәкаләтле вәкил Гүзәл Удачина исә Беренче каналдан баручы “Пока все дома” тапшыруының интернеттагы бик тә кызыклы һәм кирәкле проектына тукталды. Тапшыруны алып баручылар “Видеопаспорт” (www.videopasport.ru) дип аталган махсус сайт булдырганнар. Бу – уллыкка яки кызлыкка бала алырга теләүчеләр өчен мәгълүмати-эзләү системасы. Сайтта төрле регионнардан балалар учреждениеләрендә тәрбияләнүчеләр турында тулы мәгълүмат бирелгән. Һәр видеопаспорт – нәни малай яки кызның гадәтләре, уңышлары, сәламәтлеге, кызыксынулары, сәләте турында тәфсилле хикәя. Бала белән кызыксынган очракта шунда ук кайда кемгә мөрәҗәгать итәргә икәнен дә белергә була.

Якты юл

БАРЛЫК ЯҢАЛЫКЛАРНЫ УКУ