Сугышчы-интернационалист Сергей Тимашев истәлегенә мемориаль такта ачу тантанасы үтте.

Комсомолец поселогында Чечняда хәрби хезмәтен үтәгәндә батырларча һәлак булган якташыбыз, сугышчы-интернационалист Сергей Тимашев истәлегенә мемориаль такта ачу тантанасы үтте.
   Сергей Тимашев истәлегенә багышланган митингка район башкарма комитеты җитәкчесе Рәсим Асылгәрәев, Комсомолец авыл җирлеге башлыгы Ольга Сурова, районның хәрби-интернационалистлар оешмасы рәисе Айбулат Якупов, «Гиндукуш» музее директоры Резидә Гарипова, Сергейның туганнары, сыйныфташлары җыелды. Шулай ук митингка Әфганстан, Чечня, Төньяк Кавказ җирләрендә барган сугышларда катнашкан сугышчы-интернационалистлар, поселок халкы да күпләп килгән иде. Авылдашлары, хәрби дуслары Сергей Тимашев турындагы истәлекләре белән уртаклаштылар. Наталья Галицкая, Алсу Сәлахова, Рәсим Шәрифҗанов, Олег Шпорин шигырьләр сөйләделәр. Илшат Нәфыйков күңелләрне кузгатырлык итеп моңлы җыр башкарды. Барча кеше аларны тын да алмыйча тыңлады.

Мемориаль тактаны Айбулат Якупов белән Төньяк Кавказда хәрби хәрәкәтләрдә катнашкан авылдашыбыз Александр Уланов ачты.