Бу көннәрдә Галиуллиннарның ишле гаиләсе зур бәйрәмгә әзерләнә

Яңа поселогында яшәүче Җәүһәрия ханым Галиуллина турында авылдашлары, дуслары: «Балалары, ире өчен туган хатын-кыз ул», – диләр. Чыннан да, гомере буе ире Рафисны яратып, хөрмәт итеп яшәгән, ике улын һәм бер кызын бар күңелен биреп тәрбияләгән ул. Нәтиҗәсе дә сокланырлык: Галиуллиннар турында Яңа поселогында беркем начар сүз әйтмәс, тәртипле гаилә, кешелекле һәм ярдәмчелләр диярләр. Балалары да һәрберсе тормышта үз урынын тапкан, әти-әни алар өчен сөенеп туя алмый. Бу көннәрдә Галиуллиннарның ишле гаиләсе зур бәйрәмгә әзерләнә – кадерле әниләре Җәүһәрия ханымның 65 яшьлек олы юбилеен билгеләп үтәчәкләр алар. Алай гына да түгел, бу атнада яраткан балалары һәм оныклары аны Әниләр бәйрәме белән дә котлаячаклар.