Ветераннар Советының чираттагы пленумы узды.

Ветераннар Советының чираттагы пленумы узды.  Бөек Ватан сугышында Җиңүнең 70 еллыгын  үткәрү  турында чыктан-ачык уртага салып сөйләшү булды. Ветераннар советы рәисе һәм инвалидлар оешмасы җитәкчесе Гөлфидә Гыйниятуллина үзенең чыгышында авыл җирлекләре, ветераннар оешмалары, мәктәпләр белән бергә ныклы әзерлек эшләре җәелдерелүен, музейлардагы экспонатларның яңартылуын, җиңел атлетика, теннис, шахмат-шашка һәм башка төр спорт ярышлары, хәтта инвалидлар арасында республика бәйгесе үткәрелүен, Биклән, Калмаш, Күзкәй, Иске Абдул авыл ветераннарының «Аулак өй» телевидение тапшыруларында катнашуларын, Теләнче Тамак инвалидлар һәм картлар йортында, тернәкләндерү мәктәбендә тәрбияләнүчеләр белән даими шөгыльләнүләрен һәм башка күптөрле чаралар оештырылуын билгеләп үтте.   Ветераннарга медицина ярдәме күрсәтүне оештыру, дарулар белән тәэмин итү турында район үзәк хастаханәсе баш табибы урынбасары Зөлфия Дәүләтова, ветераннарны социаль яклаудагы яңалыклар, федераль республика законнарындагы үзгәрешләр турында район социаль яклау идарәсе башлыгы Гөлнара Шәфыйкова чыгышлары игътибар белән тыңланды, ветераннарны борчыган сорауларга җаваплар алынды. Соңгы елларда ветераннар өчен күптөрле уңайлыклар тудырылса да, эшлисе эшләр байтак әле. Район башлыгы урынбасары Люция Әхмәтова шул мәсьәләләргә тукталып, авыллардагы һәйкәлләрне яңарту һәм төзекләндерү эшләре, өлкән буынга игътибар турында сөйләде. Пленумда шулай ук Татарстан Дәүләт Советы депутаты Фоат Комаровның ярдәмчесе Наил Лотфуллин катнашты, ветераннар хәрәкәтенә уңышлар теләде. Пленумда катнашучылар ветераннар советының еллык эшен канәгатьләнерлек дип бәяләделәр һәм Җиңүнең 70 еллыгын лаеклы каршыларга, ул буын кешеләренең берсен дә онытмыйча ихтирам-хөрмәт күрсәтеп үткәрергә киңәшләштеләр.