2015 елда без 365 көннең 122сендә ял итәчәкбез

Россия хезмәт Кодексының 112 матдәсе буенча 1-6 гыйнвар һәм 8 гыйнвар – яңа ел каникуллары. Моннан кала 7 гыйнварда Раштуа бәйрәм ителә. Әмма гамәлдә яллар тагын да озынрак булачак. Эшчеләр тарафыннан ялларны һәм эш көне булмаган бәйрәм көннәрен рациональ файдалану максатыннан 3 гыйнвар шимбәсенең ялы 9 гыйнварның җомгасына күчерелә. Ә 10 һәм 11 гыйнвар болай да ялларга туры килә. Димәк, күпчелек халык өчен яңа елда беренче эш көне 12 гыйнвар булачак.
 
Яңа елдан кала киләсе елда 23 февраль, 8 март, 1 май, 9 май, 12 июнь, 30 август, 4 ноябрь, 6 ноябрь, шулай ук 17 июль һәм 24 сентябрь көннәренә туры килгән Ураза-бәйрәм һәм Корбан-бәйрәмдәге яллар көтә. Гомумән алганда, Татарстан Хезмәт, эш белән тәэмин итү һәм социаль яклау министрлыгы тарафыннан бастырылган календарь буенча 5 көнлек эш көне булган кешеләр 243 көн хезмәт куячак, шуларның 8е - кыска эш көне булачак. Ял көннәре исә 122 көн булачак – шуларның 18е бәйрәм көннәре һәм 5се бәйрәмнәр ял көненә туры килеп күчерелгән өстәмә яллар.