Тукай районыннан Гатауллиннар гаиләсе Президент белән очрашты

Комсомолец поселогыннан күпбалалы Гатауллиннар гаиләсе күптән түгел Казанда Татарстан Президенты Рөстәм Миңнеханов катнашында үткән «2016 ел хәйриячесе» X республика конкурсы җиңүчеләрен бүләкләү тантанасында катнаштылар. Гатауллиннар ике кыз үстергән һәм ятим малайны үз канатлары астына сыендырган гаилә. Арсланны алар Башкортстандагы социаль приюттан алып кайталар. Гаилә бик тату, бүген җиденче сыйныфта укучы Арслан укуда да алдынгылар рәтендә, рәсем ясарга оста, чаңгы һәм тимераякта шуарга ярата, татарча көрәш буенча район этабы җиңүчесе.