Кече Шилнә укучылары – эшмәкәрләр

2024 елның 24 апреле, чәршәмбе

Үткән атнада Кече Шилнә мәктәбе укучылары Казанда бизнес-кейслар буенча узган чемпионатка барып, җиңү яулады. Чемпионатка эләгер өчен алар катлаулы юл үтеп, күп көч, тырышлык куйдылар.

Кече Шилнә мәктәбенең эшмәкәрлек командасы «Песи кафесы» проекты буенча Казанда үткән хәйрия ярминкәсендә катнашып, үзләре ясаган мәче сүрәтендәге брелоклар, печеньелар, чәй-кәһвә, эчемлекләр сатып, 3 сәгать эчендә 10 мең сумга якын акча эшли алганнар. Әлеге акчаларны алар операциягә мохтаҗ баланың гаиләсенә тапшырганнар. Киләчәктә дә мондый төр тәм-томнар сату һәм иганәчеләрне җәлеп итү юлы белән кечкенә эшмәкәрләр «Песи кафесын» бер-ике елдан сафка бастырырга ниятли. Әлеге максатка ирешү өчен аларның командасында сәләтле маркетологлар, финансистлар һәм җитәкчеләр бар.