“Тукай йолдызлары” балкыды

2024 елның 28 мае, сишәмбе

Яңа поселогы мәдәният йортында «Тукай йолдызлары”, дип аталган район балалар иҗаты фестиваленең гала-концерты узды. Бу фестивальнең үз тарихы бар, элек ул «Балкыш» дип атала иде һәм анда чыгыш ясаган күп кенә балалар үз талантларын ачу, шулай ук алга таба үсү мөмкинлеге алдылар. Бу фестивальдә төрле юнәлешләрдә үз осталыгыңны күрсәтергә була: вокал, хореография, акробатика, нәфис сүз, конферанс жанрларында, гаилә ансамблендә инструментларда уйнап иҗатыңны, талантыңны ачып бирергә мөмкинлек тудырылган. Фестивальнең сайлап алу турында районның барлык мәгариф учреждениеләре вәкилләре катнашты, гала-концерт 200дән артык катнашучыны колачлады, аңа иң якты һәм креатив номерлар сайлап алынды. Фестивальдә җиңүчеләр дипломнар һәм бүләк сертификатлары алдылар. Әлеге күркәм чараны оештыручы-Тукай муниципаль районының «Мәктәптән тыш эш үзәге» бүлеге иде.. Фестиваль быел “Гаилә елы”на багышланды, шуңа күрә анда гаилә ансамбльләре дә чыгыш ясадылар. Фестивальдә шулай ук беренче тапкыр «Спорт акробатикасы» номинациясе Бар иде. Гала-концертның якты йолдызлары булып Кече Шилнәдән акробатлар командасының танылды, алар Бөтенроссия дәрәҗәсендәге турнирларда һәм конкурсларда күп тапкырлар җиңүчеләр булган яшь спортчылар. Киләчәктә оештыручылар әлеге фестивальнең географик чикләрен киңәйтергә планлаштыралар.