Татарстанга терлек кертү вакытлыча тыелды

Республикада мал-туар арасында куркыныч инфекцияләр таралуга юл куймау өчен ашыгыч чаралар күрелә. Бүгеннән башлап, махсус боерык чыкканчы, Татарстанга чит төбәкләрдән барлык төр аяклы малларны (сыер, сарык, кәҗә һ.б.) алып кайту тыела. Бу чикләү нәселле терлекләргә генә кагылмый.

Мондый карар Татарстан авыл хуҗалыгы һәм азык-төлек министрлыгында узган республика штабы утырышында кабул ителде. Министрның беренче урынбасары Ленар Гарипов билгеләп үткәнчә, Россиядә мал-туар чирләре буенча вәзгыять начараю сәбәпле, республиканы саклап калу өчен шундый катгый адымга барырга туры килгән.

Район халкы һәм фермерлар нәрсә белергә тиеш?

Ветеринария белгечләре авыл хуҗалыгы предприятиеләре җитәкчеләренә һәм шәхси ярдәмче хуҗалык ияләренә саклык чараларын көчәйтүне йөкләде:

• Ябык режим: малларны абзарларда гына асрарга, аларның башка чит терлекләр белән контактка керүенә юл куймаска;
• Дезинфекция: терлекчелек биналарына керү-чыгуны контрольдә тотарга, транспорт чараларын даими рәвештә зарарсызландырырга;
• Карантин зоналары: районнарда чит төбәкләрдән китерелгән малларны вакытлыча тоту өчен махсус урыннар булдырылачак. Алар фермалардан кимендә 5 чакрым ераклыкта урнашырга тиеш.

Татарстан Министрлар Кабинетының Ветеринария баш идарәсе җитәкчесе Тимур Галеев искәртеп үткәнчә, йогышлы чирләр килеп чыкса, бу хуҗалыкларга зур матди зыян китерәчәк. Шул сәбәпле, мал асраучылардан ветеринария кагыйдәләрен төгәл үтәү һәм чит төбәкләрдән «кулдан» мал сатып алмау сорала.

https://tukai-rt.ru/news/yanjaliklar/tatarstanga-terlek-kertu-vakytlyca-tyeldy