«Кыюлык» йөрәктә: Кнәз мәктәбе чын патриотларны тәрбияли
Кнәз мәктәбендә «Кыюлык» («Отвага») исеме астында хәрби-патриотик клуб эшләп килә. Бу — балалар һәм яшүсмерләр берләшмәсе, аның эшчәнлеге гражданлык җаваплылыгын һәм Ватанга мәхәббәт тәрбияләүгә юнәлтелгән.
Клуб программасы хәрби тарихны өйрәнүне, башлангыч хәрби әзерлек нигезләрен үзләштерүне, истәлек чараларында һәм хәтер вахталарында катнашуны үз эченә ала. Үсмерләр практик дәресләр аша тигез һәм төз итеп сафка басу әзерлеге, шулай ук туристик походлар аша физик чыдамлыкны, лидерлык сыйфатларын һәм командада эшләү күнекмәләрен үстерәләр. 12 ел дәвамында клуб белән Татарстан Республикасының физик культура һәм спорт отличнигы, 30 еллык эш стажы булган укытучы Виктор Белов җитәкчелек итә. Күптән түгел без Кнәз мәктәбендә булып, «Кыюлык» хәрби-патриотик клубы эшчәнлеге белән якыннанрак танышып кайттык.
— Без бу клубны 2014 елда район яшьләр эшләре һәм спорт бүлеге белән берлектә оештырдык. Ул вакытта Казанда «Зарница» хәрби-спорт уенының финалы үтә иде. Без анда катнашып карадык һәм үзебез дә сизмәстән 3нче урынны алдык, шулай итеп «Победа» уены финалына чыктык, — дип башлады сүзен Виктор Иванович. — Шуннан соң бер генә уенны да калдырмадык, елдан-ел көчлерәк чыгыш ясадык.
Хәрби-патриотик клубта кече сыйныф укучылары да, өлкән төркем дә шөгыльләнә.
— Балаларым район күләмендәге барлык чараларда катнаша. Өлкән төркем спорт ярышларында чыгыш ясый, митингларда актив катнаша. Хәзер без һәр сыйныфны алып, аларны төрле конкурсларга әзерләү тәҗрибәсенә килдек. Бу — рухи-әхлакый һәм патриотик тәрбиянең бер өлеше. Мәктәп кысаларында «Зарница» үткәрәбез, анда укучылар күптөрле сынауларда, автомат сүтеп җыюда, граната ыргытуда үзләрен сынап карый. Балаларның физик әзерлеген үстерү — төп максат, — дип аңлата ОБЖ һәм ОВС укытучысы.
Виктор Белов шулай ук «Яшь танкист» Бөтенроссия хәрби-спорт уены турында горурланып сөйләде. Аның балалары да һәр елны әлеге мәртәбәле уенда катнаша икән. Бу елны гына да хәрби-спорт чарасында Татарстанның 39 муниципаль районыннан 100дән артык катнашучы җыелган. Уен программасына «Каршылыклар полосасы», «Граната ыргыту», «Симуляторда хәрби машиналар йөртү», «Электрон тирда ату», «БПЛА пилотлау» һәм башка шундый сынаулар кергән. Княәз мәктәбе укучылары — Азат Гыйльманов, Зәринә Яруллина һәм Евгения Ким — яхшы нәтиҗәләр күрсәтеп, дипломнарга лаек булганнар һәм бүләк итеп Мәскәүгә юллама алганнар.
— Быел гына да без дистәләгән диплом яуладык. Соңгы мисаллардан — «Зарница» уены. Муниципаль этапта кече төркем — 1 урын, өлкәннәр — 2 урын алды. Шулай ук «Отчизнага хезмәт итәм! Халыкка хезмәт итәм!» республика олимпиадасында да уңышлы чыгыш ясадык. Укучыларым Эмиль Ёлкин, Аяз Тәһәвиев һәм Радмир Таһаутдинов дипломнар һәм сертификатлар белән бүләкләнде. Алар шулай ук «Укыту хәрби-кыр җыеннары» программасын үттеләр, — ди Виктор Иванович.
«Кыюлык» — ул бары тик гади исем генә түгел. Бу — көн саен чыныга торган характер. Клуб тәрбияләнүчеләренә карап, патриотизмның гади сүзләр түгел, ә хезмәт, дисциплина һәм Ватан белән горурлык икәнен аңлыйсың. Виктор Белов кебек остазлар җитәкчелегендә балалар ышанычлы, җаваплы кешеләр булырга өйрәнәләр. Кнәз мәктәбенә барып кайткач, шуны аңладым: гражданинны тәрбияләү дәреслектән түгел, ә укытучының шәхси үрнәгеннән башлана.
Чыганак "Якты юл"