Агач авып, машинага зыян килсә нишләргә?

Әгәр машина өстенә агач авып, ул зыян күрсә, иң элек барлык зыянны һәм вакыйга ничек булганын теркәп, дәлилләр җыярга кирәк. Аннары зыянны каплату өчен иминият компаниясенә яки судка мөрәҗәгать итәргә мөмкин. Юрист Валентина Бачурина мондый очракларда ничек дөрес эш итәргә кирәклеген аңлата, дип РИА Новости хәбәр итә.

Аның сүзләренчә, иң мөһиме — барысын да төгәл итеп теркәү.

«Машинаны, килгән зыянны, якындагы юл билгеләрен, адрес такталарын, юл сызыкларын һәм агачның үзен дә фото һәм видеога төшерергә кирәк. Дәлилләр күбрәк булса, яхшырак. Аннан соң полиция чакыртырга кирәк», — дип аңлатты ул.

Юрист әйтүенчә, мондый очракларда җаваплылык закон буенча билгеләнә һәм җирне кем карап торуына бәйле. Әгәр агач ишегалдында булса — идарәче компания, паркта булса — шәһәр хезмәтләре, ә шәхси җирдә булса — хуҗа җаваплы.

Әгәр гаеп расланса (мәсәлән, куркыныч тудыручы агач вакытында киселмәгән булса), зыянны капларга тиешләр. Әгәр гаепле кеше ачыкланмаса, мәсьәлә суд аша хәл ителергә мөмкин.

Иминият мәсьәләсенә килгәндә, КАСКО полисы булган очракта кайбер зыяннар капланырга мөмкин, әмма ул килешү шартларына бәйле. Ә ОСАГО полисы мондый төр зыянны капламый.

Чыганак "Якты юл"