Хуҗалыкта чәчүлек мәйданнарында корткычларны булдырмау чаралары күрелә.

“Тукай азык-төлек корпорациясе” 1 мең гектарда кукуруз чәчүне тәмамлады. Чәчү вакытында авыр, күләмле эшләр хуҗалыкның тәҗрибәләре игенчеләренә генә түгел, “Тукай азык-төлек корпорациясе”нең яшь механизаторлары: Раяз Вильданов, Алмаз Гәрәев, Илсур Насыйбуллин өлешенә дә тиде. 

 

Әлеге вакытта хуҗалыкта чәчүлек мәйданнарында корткычларны булдырмау чаралары күрелә. Бүген 220 гектар борчак басуын “Фастак” препараты белән борчага каршы эшкәртәләр. Агрегатларда Валерий Фролов, Анатолий Константинов, су ташу машинасында Айдар Фәрдиев хуҗалыкның баш агрономы Зөфәр Гайфетдинов җитәкчелегендә эшлиләр. Кичәге көнгә алар барлыгы 1 мең 500дән артык гектар җирне эшкәртеп чыкканнар. “Быел көннәрнең кызу булуы аркасында борча үрчеде. Аларга ныклы көрәш алып барабыз. Борчак басуыннан чыккач та, тагын бер зур эш башкарасыбыз – чүп үләненә каршы чаралар күрәсебез бар”, – диде хуҗалык җитәкчесе Мөсәнниф Ханов.