Калмия авыл мәдәният йортында "Варенье тамашасы" уздырдылар

Калмия авыл мәдәният йортында  бик күңелле, мавыктыргыч  бәйрәм "Варенье  тамашасы"   уздырдылар. Барысы да шат иде!Конкурста үзләренең тәмледән-тәмле кайнатмалары белән Фирдания Галимҗанова, Гөлбостан Гәрәева, Фәйрүзә Гыйльфанова, Энҗе Галиәхмәтова, Гөлбостан Кәшбелова, Мәүсилә Әхмәтнурова һәм тагын бик күп уңган хуҗабикәләр катнашты. Тәмле бал алып килгән Фәүзия Сәхапова да алардан читтә калмады.
 
 Бәйрәмгә килгән һәр кеше әлеге татлы кайнатмалардан авыз итеп, үзенә ошаганы өчен тавыш бирде.   Бәйге нәтиҗәләре буенча беренче урынны Фирдания Галимҗанова яулады. Аның нарат күркәсеннән ясалган кайнатмасы күпләргә хуш килде. Икенче урынга шомырт кайнатмасы белән Гөлбостан Гәрәева лаек булды. Өченче урынга исә сырганак кайнатмасы белән Энҗе Галиәхмәтова чыкты. Җиңүчеләргә Разим Дулфукаров хәстәрләгән бүләкләр өләштеләр, җырчы Гөлназ Фәрхетдинова бу уңган хатын-кызларны җыр белән тәбрикләде.

 Бәйрәмнең икенче өлешендә исә, әлеге чарага килгән һәркем кайнар коймакка тәмле кайнатмалар ягып, хуш исле чәй эчте. Бергә аралашып, матур итеп ял иттек. Бәйрәм тәмамлангач җыелган кунаклар әлеге бәйгене оештырган мәдәният йорты хезмәткәрләренә шундый матур, кирәкле чараны уздырулары өчен рәхмәтләр әйтеп, алга таба да мондый бәйгеләр уздыруларын теләп таралыштылар, дип хәбәр итте Калмия авылыннан Әнҗе Галиәхмәтова.