«кул җитмәгән» мәсьәләләрне дә күтәрделәр.

1 октябрь көнне, район хакимиятендә шәһәрдәге ярминкәләрдә катнашу мәсьәләләренә багышланган киңәшмәдә, фермерлар һәм авыл хуҗалыгы җитештерүчеләрен борчыган сораулар уртага салып сөйләшенде. Район башлыгы Васил Хаҗиев күзәтчелек итүче органнар – Роспотребнадзор, фитосанитария, ветеринария хезмәтләренә таләпләрне үтәү, сатуга китерелә торган продукцияне тикшерү, келәймә сугып үткәрүне тоткарлыксыз башкару бурычын куйды. Киңәшмәдә катнашучылар урамдагы сәүдәне оештырудагы моңа кадәр «кул җитмәгән» мәсьәләләрне дә күтәрделәр. Әйтик, тукайлылар сәүдә итәргә күнеккән Сарман трактында ярминкә эшләгән вакытка җиңел машиналарның узып йөрүен туктатып торырга кирәклеге әйтелде. Гомумән, сәүдә итү культурасын күтәрәсе бар. Ярминкәләрдә булучыларның барысы да моның белән килешер. Сәүдәгәрләрнең чиста алъяпкычлар, баш киемнәрдән булуы шарт. Оешма, хуҗалыкларның атамалары танылырлык итеп язып куелса, анысы да бик яхшы булыр. Җил-яңгырлы көннәр өчен чатырлар булдыруны кайгыртырга, чүп җыю өчен контейнерлар һәм биобәдрәфләр куярга кирәк диелде. Ассортиментка килгәндә, ул төрле: бәрәңге, ит, сөт, яшелчәне шәһәр халкы яратып ала. Бөртек, печән, тиресне дә сорыйлар. Район хакимияте әлеге җәһәттән авыл товар җитештерүчеләренең барысын да үзләрендәге товар белән сәүдә итәргә чыгарга чакыра. Әлбәттә, ярминкәләр турында сүз алып барганда һәркемне бәяләр мәсьәләсе кызыксындыра. Шәһәр халкының сыйфатлы продукцияне очсызга аласы, авыллыларның кыйбаткарак сатасы, акча кертәсе килә. Әлеге җәһәттән район авыл хуҗалыгы һәм азык-төлек идарәсе башлыгы Хәйдәр Сабитовның әйтүенә караганда, республика Авыл хуҗалыгы һәм азык-төлек министрлыгыннан кайбер төр продукциягә тәкъдим ителгән бәяләр җиткерелгән. Аларга күзәтчелек ителәчәк, әмма аңлашылганча, базар аны үзе көйләячәк. Быел да ярминкәләрдә сату итүчеләргә юл чыгымнарын өлешчә кайтарачаклар.